ORGANIZIMI I PROJEKTIT
YIHR-ja do të krijojë një formë aplikimi që do të përmbajë të gjitha informacionet rreth kritereve të zgjedhjes së studentëve dhe të dhënat e sistemit të vlerësimit. Bashkë me formën e aplikimit të gjithë kandidatët do të sjellin certifikatën që janë studentë të vitit të fundit të studimeve, certifikatën e notave dhe kopjen e indeksit ku tregohen provimet e kaluara. Kandidatët duhet ta dërgojnë dokumentacionin përmes postës në adresë të projektit ose ta dorëzojnë atë personalisht ne zyrat e YIHR-së .
Secilit aplikacion të pranuar nga posta do ti shënohet numri i referencës dhe do të procedohet në formën elektronike. Gjatë periudhës së pranimit dhe të procedimit të të dhënave aplikacionet që nuk i përmbushin kriteret themelore do të refuzohen. Në të njëjtën kohë do të formohen dy lista radhitëse, lista e parë që do të përfshijë kandidatët e shkencave natyrore dhe teknike dhe lista e dytë që do të përfshijë kandidatët e shkencave shoqërore dhe të arteve. Listat po ashtu do të përmbajnë numrin e referencës, emrin, mbiemrin e kandidatëve dhe notën mesatare në bazë të së cilës do të bëhet radhitja e kandidatëve. Të gjitha aplikacionet dhe listat do ti dërgohen jurisë për vlerësim të mëtutjeshëm.
Juria do të zgjedhë 50 kandidatë të rrethit të ngushtë të cilët pastaj do të intervistohen.
Bazuar në vendimin e jurisë 50 studentë do të ftohen në intervistë, 25 studentë nga shkencat natyrore dhe teknike dhe 25 nga shkencat shoqërore dhe artet. Gjatë intervistës juria do të vlerësojë njohuritë e përgjithshme dhe atë të gjuhëve të huaja. Juria do të intervistojë nga një kandidat në të njëjtën kohë; secili anëtar i jurisë do t’i parashtroj më së paku një pyetje kandidatit; secili anëtar i jurisë do të parashtroj së paku pyetje në gjuhën e huaj të cilën kandidati e ka cekur në formën e aplikimit. Pas procesit të intervistimit juria do të zgjedhë 30 kandidatë dhe lista përfundimtare do të publikohet në ueb sajtin e projektit.
Marrja e vizave do të bëhet në bashkëpunim me Ambasadën Gjermane në Prishtinë. Për 30 kandidatët do të organizohet një takim në zyrat e YIHR-së ku ata do të informohen për dokumentet e nevojshme për marrjen e vizave (pasaportat, fotografitë).Certifikatat e fakultetit të cilat kandidatët ua kanë bashkangjitur aplikacionit po ashtu do të shfrytëzohen për çështje të vizave.
Gjatë periudhës së marrjes së vizave, do të bëhet blerja e biletave Inter-rail të cilat do tu jepen studentëve në ditën e fillimit të udhëtimit.
Studentet do të fillojnë udhëtimin më 15 korrik 2008 nga Prishtina prej nga është organizuar udhëtimi me autobus deri në Berlin ku për të gjithë do të jetë i siguruar akomodimi në bujtina rinore për një natë. Në orët e pasdites për studentët do të jetë organizuar një pritje nga Fondacioni Bosch . Nga Berlini secili sipas dëshirës së vet mund të vazhdojë udhëtimin përmes stacioneve hekurudhore të Evropës në vendet tjera ku vlen regjimi i vizave Schengen.
Kur studentët të kthehen nga udhëtimi do të organizohet një fund promovues, do të mbledhim raportet e udhëtimeve të tyre, fotografitë dhe do të krijohet një broshurë praktike për vizitoret e ardhshëm të Evropës – ku të flemë, ku të hamë, çka të shohim etj.